Kan Pathian Biak inkhawm dan hi

Kan biak Pathian hi kan tihzahawm vanga zahawm ni lo mah se, Amah a ropuina, a takna avang tal hi chuan amah betute hian kan zaha, kan awm dan, inchei dan leh chetziaah pawh a mawi leh thianghlim kan zawn a tul a ni.

Biak In chu Pathian biakna hmun a nih avangin, inchei dan, awm danah hmun danga kal dan leh chet dan aiin uluk lehzual a pawimawh. Pathian bakah mihringpuite thlirna atang pawha mawi leh zahawma awm hi a pawimawh hle a ni. Pathian Biak Ina inkhawm tur chu a pawn lam lan danah pawh a thianghlimin a fel fai tawk tur a ni. Pheikhawk pum neih ang ang bun tum hram hram tur a ni. Biak Ina kal dawn chuan Bible/Hla bu ken ngei tur a ni. Inkhawm tan hmaa Biak In tual vela din muan hi chin loh atan a tha hle bawk. Biak In chhunga luh dawnin zah taka luh tur a ni a, thut tawh hnua hawi vak vak te, phun sur sur te, nuih vur vur te a mawi lo hle. Thutthleng chunga ke hlankai te, bawp khawkherha ke tihphut hlup hlup te, thut tluan duai te pawh a mawi lo hle a ni. A bik takin tawngtai lai chuan ngil taka ke pahniha lei rapa thut tur a ni.

Thutthleng nghen chhana ban phar phei duai te, thut dan sawn chhen te, chet neuh neuh te a mawi lo mai nilovin, bula mite tan a ninawm ve thei a, chuvangin, chin loh atan a tha hle. Biak In chhunga kuhva, sweet ei te, thelret thial te, sahdah hmuam kan ching mai thin te hi Pathian kan biaka zah lohzia kan entirna a ni. Tawngtai lai a nih avanga chhuah ruk zul zul te, tawngtai dawn veleha khuh sup sup kan chin te hi a tul dan ai mahin chin than dan a nih vang mai mai niin a lang. Thut danah pawh nghenchhan hlam po, hma lam bawh ul, hla bu leh Bible dah naa ke hlan, thatchhiat hmel deuhva thut awn diai te hi a tihchi lo va, bawp bawp tih phut dur dur a tha hek lo. Biakna thil serh tihna hmun, Pathian nung biakna a nih avangin thil dang tih- lehkhabu chhiar/ziah etc.., lo nuih vur vur, nuih chiam, hawi vak vakk, mutthluk - ang phuauva mutthlu thin te phei chu an zahpuiawm hle a ni.

Tin, thuhril ngaihthlak lamah pawh ngun taka ngaihthlak tur a ni. Inkhawm chhan bulpui ber, ringtu zawng zawngte tih ngei tur zinga mi a nih avangin ngun taka ngaihthlak tur a ni. Thuhril thiam lem lote rin aia rei thu an sawiin, ning lutuk hmel lantira an hriat thiam ngei tura sana lo en sek chin te hi a tha lem lo. Inkhawm programme zawha chhuah danah pawh second 15-20 vel tal chu thut muan leh lawk a mawi, eng khaw sawi set set lova kawngkhar lama in hnawh tup tup te hi thil mawi lo tak a ni. A theih phei chuan rilrua lawmthu sawi tawngtai leh inkhawm ban hnu atana rei lo te inhlan hi a mawi. Tin, inkhawm bana Biak In tual vela kan inhawr khawm tup tup te hi tlem a in sum deuh chu a tha khawp mai, ni tin zan tin a in hmu te, in thenawm hnai tak te, inkhawm zawh a nih tak avanga thu sawi tur ngah thar thut a inbiak khawmuan te pawh hi a tul em em hran lemlo.A chhuak hmasa apiang in bawr khawm a, Biak In kawt vela kan par buk chhuk mai te hi a tul pawhin a lang lo.

Ringtu zawng zawng tih tur chu Pathian biak inkhawmnaa kal hi a ni. Inkhawm loh hian thil tha tih aiin thil tha lo tih nan hun hman a awl. Vawikhat inkhawm lohvin vawi hnih a hring a, Pathianin thinlungah hmun a chang lo tial tial a, hriat loh hlanin Setana tirhkoh rinawm tak nih a awm thin.