Thalaite leh khap.

Kan Zoram hian khap hi kan thanhnan tawh avangin engemaw tal khap nei lo chuan kan awm thiam tawh lo a ni ber a,engemaw tal khap hi nuam kan ti a,kan khap chuan titha hliah hliahah kan inngai ni ber tawhin a alang.Khap hi a pawng ataka sawisel ngawt chi pawh a ni hran lova.Khap ngai ngawih ngawih chu a awm.YMA in Kumpuan atan Ruihhlo Do a hmang a, a tha mang e.Hetah zet hi chuan YMA member zawng zawng hian hlawh nei lovin Sawrkar hna kan thawk hia ni ta ber a, induhna tham chu a ni.Sawrkar tan lah mualphona tak a ni bawk.
Ruihhlo te, zu te leh taksa tana thil thalo hrim hrim hi chu khap a tul mai pawh a ni lo, tih makmawh a ni zawk.Amaherawhchu,khap kan han tih hian khap hi kan thatpui leh puiloh pawh ngaihtuah miahlova engkim mai khap kan tum ta emaw tih tura khap kan ngah ta lutuk hi chu a dik ber ta hauh lo.
Thawkkhat lai khan Aizawlah Pool khelh kha a lar viau mai a,thalai lamin an lawm teh reng nen thenkhat chuan an khap leh hmanhmawh pek a,Cyber Cafe pawh kha thalai tam tak chuan an tangkai puiin khawvel dang chanchin hriat tuma tumah tibuai lova an awm melh melh maite kha a hnawksak loh tehlul nen kan ngaithei tlat lo leh hman a, finna leh hriatna chharchhuah tuma mi thu ngawi mai mai kha thilsual titur riakah kan ngaitlat a nih kha.Chutihlaiin zan rei tak takah eng Kohhran thalai emaw chuan Bible chhiarin Mike nen an rak vak vak a, thil tha ti lua ah kan ngai hlauh thung.
A thuhrimah khap tih hi chu Eden huan ata tawh khan a la hlawhtling lo zel chu a nih hmel,Pathian pawhin tihloh tur a tih kha mihringte hian kan bawhchhia a, Eden huana bawhchhetu thlahte tho kan la nih avangin vawiin nia lei mihringte hian kan bawhchhiatloh bik na tur a awm lem lovang.Chumi awmzia chu khap hi chu khawvelah hian a hlawhtling mawh khawp ang tih kan sawi tumna lam a ni e.
Mizote hi hma kan sawn a, kan thang kan inti a, a dik pawh a dik chiah mai.Amaherawhchu, kan hmasawn dan leh kan sukthlek dan han en hian kan hmasawn danin duhthu a sam lo em mai hi a buaithlak a ni.Incheina lamah hma kan sawn a,(hma sawn pawh kan ni chiah lo, kan piangsual ti ila a dik zawk mai thei!) chutihlaiin hnathawh kan zak theuh a,chhungte thawhchhuah saa intih engemaw vel kan zak miah lova.Kut hnathawh uar turin kan inzirtir a, miin thahnemngai takin thil a han ti leh tak tak dawn a, hnawksak ka ti leh riau mai a,zan rei tawh a,mi khawlai vak mai maite hi kan hmu engemaw tlat zel mai hi chu a mak thin ngawt mai.Zu chungchanga ka ngaihdan phei hi chu sawi pawh ka sawi ngam chiahlo, mi ngaihdan nen a lo inmil lo a nih phei chuan helam chungchanga ka ngaihdan ziak tawh lo turin tute'n emaw min khap ve ang tih ka hlau deuh a ni.Thalai rualte hi an tha a za a, chumi hrithla turin engemaw tih an chak zek zek a,chu an thil tih chak kan khap sak leh si thinte pawh hi a ni mahna heti em em a ruihhlo kan buaipui tak chiam ni.
Naupangrualin kawngpui dungah football an khel a, kan hau a,field lamah an kal a, puitling zawkin an lo chhuahtir leh a,puitling zawkte ang bawkin engemaw tih chakna an nei ve tho a,chumi an tihna tur hmun awm lo lutuk an tan chuan a manganthlak a ni.
Naupang hian a tlaina turin engemaw khalh tur an mamawh a, an thil ken leh khalh apiang hi laksak ta zel ila, a tawpah chuan tahlo chu hmabak engmah a nei lo.An han tah tak tak chuan a buaiate chu a awmtute bawk kha an ni.Tunlaia kan thalaite dinhmun pawh hi chutiang chiah chu niin ka hria.
Engthil pawh hi khap dawn ila, a pawimawh hmasaber chu ruahmanna fel tak siam hmasak hi a ni.Engmah ruahmanna siam hmasa lova khap burh m,ai hi chu sulhnu a buaichuar duh khawp mai.