Dei dei mobile phone!!

Aizawlah BSNL kaltlanga digit nga nei phone number kan hrita hma chuan zualko leh puarak ngaltha chu hah tak a ni.Kan biakhlatna khawl neih hmasak ber-Morse code kha chu, torchlight leh battery man bak sen belh tur awm lo mah se,tlang lawn kher a chawh a,tlangah pawh chhum a zin phui chuk chaun 'signal busy' a la awm tho! Tuna BSNL leh Airtel in min thutchilh hnu hi chuan kan 'busy' dan a dang ta-kan nunphung a buai a,dar insi cheta thute pawh kan inbe thei ta mang lo!!
Kan ramah mobile phone(mizoramah chuan kan ti deuh ber cellphone tih aiin) chu thil thar a la ni.Thil thar khalhin kan la khal a,kan la ning lo pawh a ni mai thei.Mahse sapho chuan an mobile phone khal ngun lutuk an chhiatpui a, an khawtlang nun a tibuai phak a, an chauhpui mek.
Text message hmanga 'I chawn a lian' tih thu mai mai hmanga zankhaw tairek thleng thlenga kan inchhaih lai te; 'Chutah chuan funte a tlawm' tihna'na mobile phone kan leklam mai mai lai te; Biak In hungchhung atanga Pathian thu lam hawi reng reng lo programme 'set' nana kan han hman zat zat lai te; kan tel lo chung paw'n thil chu a nih dan tur ang a ni pha tho dawn tih inhre hauh lo va.khawi lai puipunna hmun atang emawa thu holam te te kan phunpui ve niah niah lai te hian kan changkang ta, tih a kawk em?
Kan ramah Internet a rawn inthlung a,media mite leh tih takzeta zinzir mite tih loh chuan an hlawpui lemlo,an tih hi a dik em? Cafe-a hun khawhral tur leh thu veikhawr tete sawi tura kan luh hian sum leh hun chauh ni lovin,keimahni leh keimahni kan inkhawhral a ni tih kan hriatthiam hunah mobile phone chungchanga kan kim lohna hian min beng harh ve chauh ang em? Lei chhungrila zung neih ngheh a, chuta tanga chawr chhuah a, a nih dan tur anga par chhuah hi kan tum tur ni awm tak a ni a; mahse BA pass hnua lehkha zir tan chauh tum hi kan tam hmel!
Mobile phone hian min luh khung tawh a,min chhuahsan leh tawh dawn lo.Mobile phone chungchangah hian lo inhnial a,nei awm leh awm lo thliar vak vak lo tum hi a tulna a awm hek lo.Tul leh pawimawh ber zawk chu sapho nun leh mobile phone atang hian kan inbih ve angai a; phone-ah chauh nillovin,kan ni tin nunphung leh eizawnna,kan ram sum leh kan suangtuah ram zawng zawng pawh hi 'mobile' ve sela, kan phone chauh nilovin keimahni pawh hi 'busy' i tum zawk teh ang u.Chaw ei khawmte hi kan hman hlawm der dur lutuk!!