Tim Van Damme Inspired by Tim Vand Damme

About Me

My Photo
thinchhia
Han about tur vak pawh ka hre lo!
View my complete profile

Blog

Monday, July 30, 2007

Khawiah nge Thlahtubul Evi thlan? (Thawnthu hlui)

Jeddah khawpuia an kawngpui zau leh sei ber, Medina Road zawhin chhim lam pana i kal chuan kawng sirah India Flag inkhai i hmu ang a, chu chu Indian Embassy a ni a. Chu mi atanga metre zanga velah chuan kawngpui chu tawpin kawngpui dang pali a peng darh ang a. Thlang lam i en chuan dil mawi tak, a kama chawlhna nuam tak an siam chu i hmu ang a. I thlir hlat deuh chuan Red Sea dumpawl ruih mai lo chu angmah dang i hmu lovang. Chhim lamah chian an dawrpui zau ber, khawvela thil siam tha tinreng an len khawmna, Jeddah khawpui hlui a innghahna hmun i hmu bawk ang. Chhak lam pang i thlir chuan Lal In hlui mawi taka sak, tun Saudi Arabia sorkar Foreign Ofiice ni ta, Red Sea kam hawi zawnga sak i hmu ang a. Chumi In hnungah chuan lung banga inhung, hmun khat i hmu ang a, mak tih nachang i hre lo mai thei a, eng nge awm tih pawh i zawt kher lo mai thei. Mahse i zawh palh hlauh chuan khawvela thawnthu hluiber zinga pakhat an lo hrilh ang che. Chu mi hmun chu mihring zawng zawng Nu, mihring tlukna bul, khawvel thiamloh chantirtu EVI zalna Thlan a ni.


Maktiin thil ni thei awm lovah i ruat pawh a ni mai thei. I rin loh thu i sawi chuan i rin theih nan thawnthu dang tam tak an hrilh ang che. 'An' ka tihte hi Muslimho an ni. Muslim chu tute nge ni ? A.D.570 khan Jeddah kiang lawk khaw pakhat Makkah-ah (Tunhmaa Mecca tih thin kha) zawlnei Muhammad-a a piang a. Sakhaw pakhat a din chhuak a, chu chu Islam an ti 'Islam' awmzia chu Pathian duhzawng tihna a ni a, chu mi zawm leh zuitute chu 'Muslim' tiin an inko.Keiniho chuan Mosolman tiin kan hre tlanglawn ber a, Arab ramah chuan he mi 'term' hi inhmuhsitna tawngkama an ngaih avangin an zingah hman chi a ni lo, hman reng reng suh ang che. Kan thawnthu sawi mek leh sawi turte hi Muslimho thawnthu a ni.

Evi sawi rakah chuan rilruin Eden huan lampang a fang nghal mai awm e. Tin, Evi kha Jeddah-ah a thih si chuan Eden huan pawh he mi hmun atang hian a hla lo a ni ang tih ngaihdan a awm nghal a. Mahse Eden huan awmna tak hi tuman an hre lo. Engpawh ni se tunah Middle East ramah ngei hian a awm tih chu hnial rual a ni lovang. Genesis-a lui hming chuang thenkhat, Euphrates leh Tigris te chu a pangngaiin a la luang reng a. Chumi lui kam velah chuan lalram ropui sawi tham tak dingin an tlu tawh a. Tun hma deuh pawh hian chu mi luiin Arabian Gulf( Persian Gulf) an zuk finna hmun, tuialh thei tamna hmun chu inchuhin Iran(Persia) leh Irag( Mesopotamia) an indo thin kha.Chuvangin Eden huan chu Irag ramah hian awm ngei turin mi tam tak chuan an ring a, a awmna hmun tur pawh chhinchhiah an nei a. Thenkhat erawh chuan Yemen ram hmun hringah ngei hian awmin an ring a; an khawpui Aden pawh hi 'Eden' hming atanga chhuak niin an sawi bawk.

Middle East hi han fang ila, kan ram angin hnimhring hmuh tur a awm lo, Lebanon leh North Yemen a tlangram hmun tlemte mai lo chu khawizu leh hnutetui luanna ram nia anlo chhal thin Israel ramte hi Mosia pawhin mittui tla chunga a thlirna Nebo tlang atangin han thlir ila, ram hring hmuh tur reng reng zuk awm lova ! Ram hring hmuh tur awm chhun chu Dead Sea ruama, Sodom leh Gommorah awmna hmun vel a ni mai. Kan sawi huai huai thin Jeriko khuate kha, tum thing leh Olive thing tlem te an chin tih mai loh chu ro tak a ni. Eden huan, khatianga hring leh hnawng tha han awmna tur awm hmun a avang hle. Engpawh nise, khawii hmunah pawh awm se, kan thawnthu sawi tur a tibuai chuang lo ve.

An sawi dan chuan, Evi leh Adama Eden huan atanga an chhuah hnu khan hun rei tak an inhloh va . A tawp a tawpah Arafat phairuamah an inchhar leh a. He mi phaizawl hi Makkah khawpui kianga awm a ni a, zau tak mai a ni. Muslim ho rin dan chuan mihring zawng zawng chunga Pathian Rorelna Ni (Day of Judgement ) pawh he mi phaizawlah hian a la thleng dawn a ni. Chuta tang chuan Makkah panin Adama leh Evi chu an kal a, an thlen hmain hmun pakhat Muzdalifah ah an riak a. Makkah an thlen chuan thil mak tak a lo thleng a. Eden huana an bawhchhiatna kha ngaihdam a nih takzia entir nan Pathianin van atangin lung dum ( Black Stone) a rawn thlak a,( chu chu hmuhtur a la awm). Chumi lung chu Scientist-ho chuan 'meteorite', ( arsi them lo tla) niin an ring. Inches riat bial vel-a lian, dum sen tle set, mam em em mai hi a ni. A chanchin tam zawk chu a hnuah kan la sawi ang. Hetah hian Muslim-ho leh Kristiante rin dan a phir tan ta a ni. Eden bawhchhiatna avanga chatuana thiamloh chantirna hnuaia mihringte, anchhedawnga awm tura Kristianten kan rin hi Muslim-ho chuan an ring ve lo. Krista Isua lo kalna chhan Muslim-ho rin dan chuan Adama lung khan a tlak daih tawh. Chuvangin, Eden sualna (Original Sin) khan anni chu a khawih buai tawh lo.

Genesis kan chhiar chuan Adama chu kum zakua sawmthum a nihin a thi tih kan hmu a, a thihna hmun erawh chu sawi a ni lo. Evi phei chu a thih thu ziakna a awm lo a ni awm e. Muslim-ho erawh chuan Evi chu Jeddah-ah hian a thi a.Red Sea kamah an phum ngei a ni tih huai takin an sawi ngam. "Jeddah" tih hming pawh hi English chuan " grandmother" tihna a ni a, mihring zawng zawng nu Evi hming chawia an sak a ni. A thlan hi laih phal ta se, mihring ruh a awm ngei chuan, eng anga upa nge tihte pawh a hriat theihna mahna. Mahse, phal a hnekin, hnai deuhva en pawh an remti si lo. Chu vang taka lung banga hung tlat an ni.

Muslim zirtirna fir takah chuan mihring thi tawh reng reng chu vaivut ang chiaha ngaih an ni a; thlan hmun chhinchhiahna leh lungphun pawh phal a ni lo. Leia awm tawh lo hriat rengna tura thiltih reng reng chu milem biakna angah an ngai. Nunna hi Pathian pek a ni a, Pathian bawkin a la kir leh mai a ni. Tin, pialrala chawl tura kalte mittui nena thlah liam hi an remti lo; ringlote tihdanah an ngai.

Evi khawpui hlui Jeddah hi khawpui hluitak, Mosia-hovina Scientific Method danglamtak hmanga an kan ngei Tuipui Sen (Red Sea) kama awm, Saudi Arabia tama lawngchawlhna lian ber, Muslimho hmun thianghlim ber Makkah tlawh turte tana Pawla kawtchhuah ang chu tunah chuan 300km aia tam bial daih a zau a ni. Evi khawpui a nih vang nge, vawn thianghlim pawh an tum hle. A kawtthler tihfaina tur ringawtan ni tin maktaduaitam tak an seng a. Thlaler vaivut thliin dim miah lovin ni tin run reng mahse a fai reng a, thote pawh hmuh tur an tlem duh dawt hle. In zawng zawng rawng var hnawih vek tur tih thupek an chhuah hnu phei chuan thlawhna atangin thlir ila, puan var tak zar dul ang a ni.

Red Sea kam, kilometer sawmnga dawn laia sei tlai lenna tur an han cheimawi tak tak mai chu Mizo mimir hisapna piah lam daihah a ni awm e. Englai pawhin pangpar mawi tak tak a vul chuk reng a; Ram chhengchhe tak, " Chhawlpial run i iang e" titu khan hmu ve se chuan, Chhawlpial run piah lam hla a siam ngei ang le !

Jeddah atangin chhak lam panin kal ta la, kilometer 80 vel i thlen chuan khawpui hlui tak, mahse thar reng si i hmu ang a; chu chu Muslimho hmun thianghlim ber Makkah an tih chu a ni. Adama leh Evi tual lenna leh Pathianin lung dum (Black Stone) a rawn thlakna hmun a nih mai vanga pawimawh a ni lo va, a chhan dang tam tak a awm. Hemi hmunah hian History thar reng tur tam tak siamin a awm a, khawvel Muslim zawng zawng an ral vek hma chaun Makkah hi a ral lovang. Chumi history zinga pahnih han tarlang ila. A changtute chu: Abrahama, Hagari leh Ismaela-te leh Zawlnei Muhammed.

Eden huan atang tawh khan hmeichhe finnain Setana a zawl a, inchhungah buaina a thlentir thin. Abrahama pawhin a nupui Sari thurawn a pawm a, a hmei Hagari lakah fapa Ismaela a nei a. Evi thil tihin inhnawhchhuahna a thlentir angin Sari remruatna avangin Hagari leh a fapa Ismaela chu thlalerah vakvai turin hnawhchhuahin an awm a. An nufa vakvai chuan Makkah an thleng a, mahse tui in tur reng reng an hmu lo. Ismaela chu tuihalin a thi mai dawn si; a nu chuan a en ngam lo. Hmeichhe hmanraw tha ber hman mai loh chu tih dan tur dang hre hek lo, Hagari a tap ta chiam a. A tap thawm chuan Angel Gabriela a au thla a; lei char atangin khawngaihna tui a lo chik chhuak ta a. Hemi tui hi 'Zamzam Tuichhunchhuah' an ti a(vairam Muslim tamna vengah pawh Zamzam tih dawr hming a hmang an awm fo hi), tun thleng hian kang lovin a la chik chhuak reng.

Muslim-ho sawidan chuan hun engemaw hnuah Abrahama pawh Makkah-ah hian Hagari leh a fapa Ismaela fin turin a lo thleng ve a. Hemi hmunah hian chanchin pawh a ngah hle. Maichama a fapa Ismaela hlan tura a kal thu leh a hnu a thil awm dante ziak ngeiin an nei ve a. Anni sawi dan chuan Abrahama'n a fapa hlan kha Isaka ni lovin Ismaela a ni zawk a; a hlanna hmun pawh Makkah kianga Moriah tlang a ni a; a hmun pawh an la chhinchhiah reng.
An sawi zel dan chuan, Pathianin Abrahama hnenah, ' Tunah i fapa neih chhun, Isaka hruaiin Moriah ramah kal rawh' tia Genesis 22:2-a a sawi hi a dik lo. Achhan chu hetih hun lai hian Isaka kha ala piang lo.Ismaela a pian chuan Abrahama chu kum zakhat a ni tawh (Genesis 21:5) chumi awmzia chu Ismaela kha Isaka aiin kum 14-in a upa zawk a nih chu. " I fapa neih chhun" a tih avangin Isaka pian hma, Ismaela chauh a nih lai a ni ngei tur a ni tiin an tang bawk.

Abrahama chu rinna thua fiah a nih hnuin Makkah panin a fapa leh a hmei Hagari nen hlim takin an lo hawng a. Chumi hnu chuan Abrahama chu Pathian biakbuk sa turin thu a pe a. A fapa Ismaela ne chuan biakbuk chu an sa tan a; Adama lung dum kha a kil thutah an hmang nghal a. Hemi biakbuk hi Arabic tawngin 'Kabbah' an ti a; khawvela Muslim zawng zawng, an tawngtai apiangin, he Pathian In lam hi an hawi thin. Hemi in hi vawi tam tak tih chhiat a ni a, mahse a hmun ngaiah bawk a ding that leh zel a. Tuna an Kabbah hi kil li neia sak, feet 55 a sang, a dung feet 45 ve ve leh a lehlam ve feet 35 a ni a. A kawng kharpui chu rangkachak hlira siam a ni. A chhak lam kilah chuan lei atanga feet 46 vela sangah Adama lung, lung dum, lung thianghlim kan sawi tak kha silver casket chhungah an dah bawk a, a chhunga an dahna chhan chu hmun thianghlim tlawh tura lo kal hovin an fawp ral thei mai dawn nia an hriat vang a ni. Kum tinin mi maktaduai tel in hemi lung hi an fawh avangin (TV ah pawh a lan thin thi,kawrvar vek ha in an phut mur mur thin hi) a rawng dum sen tle set mai chuan a mamna leh tletna a hloh tial tial a.Chumi bakah misual in an ruk bo mai an hlau bawk a.

Kum 930 A.D. lai khan Muslim zinga pawl khat Carmathians ho, Saudi Arabia chhak lam ram Hufuf vela awmten Makkah hi an run a, lung dum hi an la bo a, mahse a hnuah an chhuh leh a ni. Lung dum hi tunah bo ta sela Muslimho zawng zawng hian mutmu an tuah lo vang.(Osama Bin Laden a leh a pawlte pawh mi thah tumin an buai an buai hman awm love). Tin, hemi Kaabah kawngkapui zawnah hian lungpui pakhat a awm a, chu chu Abrahaman Pathian a biakna hmun a ni a; lung chunga a ke hniak pawh a la awm tlat mai ! A lungpui chu mawi takin an hung a. A kiang lawkah chuan Zam Zam Tuichhunchhuah kan sawi tak kha a awm bawk. Kaabah hualchhuakin temple an rem a, a zau hle a,gate pawh 39 a awm.A hung chhungah chuan Mizorama mipui zawng zawng a rualin an inkhawm thei ang.

Abrahama sulhnu hi Makkah velah chang nilovin Saudi Arabia hmar chhak ram velah pawh a awm an ti. Damman khawpui kianga hmun pakhat Hasa-ah i kal chuan Abrahama chenna thin ni-a an sawi puk an entir ang che. Kaldai rama Ur hmunah a pem hmain Hasa velah hian Abrahama chu a cheng niin an sawi. Israelho pawhin an pipute chenna hmun hlui, ram lak tur an ruahman hmasak berah chuan heng Saudi Arabia hmun thenkhatte hi an map-ah an telh a ni awm e.Mahse a hnuah an ban leh a, khawvela tuialhthei tamna ber hmun a ni tih an lo hre si lo.

Genesis Bung 16 leh 21 kan chhiar chuan a hmaa kan sawi tak chanchin kha Mosia pawhin a ziak chipchiar hle a, a pawimawh reng bawk a.Sari fapa Isaka thlahte, Judaho emaw Israelte leh a hmeinu Hagari fapa Ismaela thlah Arab-ho inkara inhmelmakna khawvela lo la awm tur pawh chiang takin a lo sawi lawk a. Israel ho leh Arabho, Abrahama fa te ve ve inkara inhuatna chuan kum sang tam a lo vei hnu pawhin eng a ang thei chuanglo. Ni a chhuah hnem poh leh an inhmelmakna a zual mai a ni.

Kristiante tan Bethlehem a pawimawh ang bawkin Muslimho tan Makkah hi a pawimawh chung chuang a, a chhan chu Zawlnei Muhammed (570-632 A.D.) pianna hmun leh Islam sakhua a dinna hmun a nih vang a ni.Chumi sakhua zuitu Muslim chu khawvelah hian 1,254,222,000 an awm a.Khawiah pawh ni chhuahna piangah Makkah lam hawiin ' Allahu Akbar' (Pathian pakhat Ropui) tiin Muslimho chu matheilovin vawi nga tal an tawngtai a; Pathian an fakna ri chu a tawp thei thin lo. Khaw thianghlim tlawh tura Makkah a kal thei ngatte chu hman laia thangchhuah dinhmun changtu ang kha an ni.(Mizorama vai mistiri leh labour ho pawh hi zawt ila an kal chakna ber a ni zel)

PS: Muslimho thawnthu a nih avangin Kriatiante thawnthu anga chhiar tur a ni lo.Naupan tet atang i Bible thawnthu hriat dan kha vawng tlat rawh.

6 comments:

Ooops said...

A va sei em em ve, a lem dah tel teuh la..

thinchhia said...

Ooops a seingawt mai..

illusionaire said...

Thinchhia te,

Please visit:

Mizo Bloggers Directory

and register there. You can enter what you like about yourself :) I am planning to make a Directory of all the Mizo bloggers.

Thanx.

thinchhia said...

hahaha lo tum donnia..poisa hloh theih ngem

majESTY^YTSEjam said...

khoi site atanga i lak chhon nge a vanlalPangaih lol...... sei deh duah lutuk a, ka chhiar chhuak ta lo mai.... :P

thinchhia said...

internetah hian awmlo a awm hleinem, music ringawt lo pawh U Tete :)

Post a Comment