Tim Van Damme Inspired by Tim Vand Damme

About Me

My Photo
thinchhia
Han about tur vak pawh ka hre lo!
View my complete profile

Blog

Saturday, January 6, 2007

Thaimami ka duhthusam

Nupui tura ka duh chu 'Mizo kan ni...' tih thinlung taka sa thei, a hming tawpa 'a' ni lo 'i' awm ni se.Khapdiau ang maia kal dul hnuk hnuk leh hawi ngiai ngiai emaw, zawngsihsiamsual ang maia taksa chetna dawng hnem leh phanchang lutuk emaw, chhemthei tia lek chawnban nei leh kawmthlangte pal ban tiata chawn lian emaw, powder pawp kar atanga meng kual rawlh rawlh thin emaw chu nupui tura ka chhai thlukzawh loh ka inbeisei thuai.Hetiang mite hi chu 'I tan ka tling lo...' tih hla ka sak khum lui palh ve chawk ang.
Sahel ei mi a nih loh chuan a kutke tin zuah thut turin ka phut harsa lo mai ang e.Nurse zir chhuak hlim ang maiin, Faina Hapta hman ve kher ngai lo leh beisei lovin fai vang reng mai se! Biak Inah lah khuangpuin khuang a vuak thelh phah zawk zawkna tur khawpa inchei chu hlawh nei pawn a duhlo tur a ni a.A thu 'off-side' ngai tur a ni hek lo.Mami nu tur a nih miau avangin kawtthlerah a mal ding lam a show pawh a thiang bawk lo.
Zep nak emaw, thla lan danin nungchang a tihdanglam theih chu kei lungmawl tehlul hian ka luah zo lo vang.Khawlai dunga Dumka hlawh la ang maia nui thler duai duai chite lah hi, ka phu loh vek an nih vang hian chhai loh law law ka tum hmak.Mami nu tur chuan a hmaa kalte ngaihthat lohna turin nuih emaw, phun sep sep emaw hrat lul suh se.Chuti lo chu, ka hmu 'Biangnovi' reng thei lo dah ang e.Tu emaw ' ka ngei e/ka be duh lo ve' a tih tuah hum a nih vaih chuan ka ma ang, ka ma ngei ngei ang!
Khawvel uaithla lamah hian Pathian thuchah kan ngaihthlak leh tawng tualleng hi 'tawngtial' in a pawlh chhuai tawh a. Mi fiamthu thawh te paw, a! a lo bengngawng nuih ve ngawt thin a nih chuan lainatna vangin khawthlang zai vawi tam ka sa dawn tlat.Chuvangin, kawmthlangnu ang ema sentence tina Sap tawng mal khat tal telh ziah thei ni lo mah se, 'Akbar was a king..' tih zir thleng chu ni hram se maw le.Chutichuan, mi titi haw lam leh kal lam chu a man thiam ve ruai ruai dawn a ni.
Din chhuahpui tham hmelchhe chhungkua kan din ngawt loh nan hmel pawh chuti tehchiama chuti he hu lo ai chuan, rose par anga chei ngai lova hmeltha ni zawk se - Mami nu atan ka iai hauh lo vang.Kan chaw bel a rawn tuai vir hmain khawtlang tana mi tangkai, Kohhranah pawh a phak ang tawk a inhmang leh sakhuana ngai pawimawh, Kristian chhungkaw dinpui theih tur hi a ni, Matea nu atana ka duhthusam leh lungkham ber zawk chu!
Tin, heti hian duhai ka han sam kual leh ta zel a; zuk leh hmuam hi do tawih tawih lovin ti ngailo tawp se a va duhawm lehzual dawn em! Mami nu tur nge nge chu! Warning pek ngai lova fawh tlak, lei bak thil dang hmuam lo a nih chuan angel hawl thlak ai pawhin thianghlim cheuvin ka ring.E..... zingkarah thawh hma vangin tum luau ngai lem suh se! Chuti lo zawng, hmana a hnar bawrh bawrhna hmunah mumang nei leh thin turin ka tir daih ang!

5 comments:

Anonymous said...

Oinks oinks

mary MARY said...

matre ih mom mi ka nei a tih hunah poh i hmangaih tak tak chuan i ma miah lo ang tih ka soi ngam sak hehe

thinchhia said...

@ mariemarie hehehe ngeihloh leh hautngah mihring ka sawi uar na nih kha.lo ma ta pawh ni ila ka ko leh mai anga sin(Mapuia of Zephyr) ang deuh khan hihi

virgochhas said...

ka van tla chiang kuang bal bal ve le...

chawn chhemthei tia lawng nei keini ang tan chuan a bak kha chu chhiar xom toh loh mai kha a tihchi xok in ka hria

:P

thinchhia said...

eeeeeee ilo chuti elo, a chunglam a len trut loh chuan chunglam nen a in phut tho ang chu.modelling lam te chi loh maw?
duhthusam khi nei ta ila, hmangaihna a telloh chuan engtihna vak a nih pawh ka ring chuang hleinem.

Post a Comment