Hmangaihna hiiiiiiiiiiiiiiiiiiiiiiiiiiiiiiii

Eng hun laia lo intan tawh nge, tih pawh hriat loh, sakhaw lehkhabute pawhin a awmzia a tihdanglam chuang loh, hmangaihna hi mihringte nun tinuamtu leh tihlim bertu a nih rualin, mite rilru tina thei ber leh tilungngai thei ber pawh a tih theih a. A awmzia hriatthiam dan leh tihlan dan pawh mi hrang hrangah inang lo tak a ni.
Hmangaih berte tana nunna hial hlan thak ngam an awm laiin, hmangaih berte nunna hial laksak duhtu an awm bawk si. Thenkhatin an tih theih miah lo tur pawh hmangaihte tan chuan tihsak an inhuam thu an tlangaupui a, thenkhat thung chuan tihhminghliau bakah sal ang maia chhawr an hreh miah lo.Thil ropui tak min tihtir theitu a nih rualin, a kal fuh loh chuan thil tha lo ber thlentu a ni thei a. Inremna thlentu a nih theih rualin inhuatna hmahruai a ni fo bawk si.
Pa awmkhauh leh dehkhirh berte thinlung titui theitu, pasaltha leh huaisen tawp pawh khurhtir theitu, thilsiam dang leh rannungte pawhin an lawm em em ni bawk si hi tun thlenga mihringte zir mak zel leh hriatthiam tak tak theih loh a la ni ta fan a nih hi.
Mi tam takin hmangaihna lanna ni a kan hriatte hi han en ta ila hmangaihna a lo ni reng em:
• Love at first sight: Hmangaihna tak tak chu rang takin a thleng ngai lo. "Ka hmuh tirhin ka hmangaih nghal", tih hiana awmzia tak chu khamiah khan a duhthusam thenkhat a hmu nghal, tihna chauh a ni.Tu emaw hmel lan dan te, a nungchang leh a tawngkauchhehte chuan min hip thei nameuh mai.Hmangaihna intanna a ni a;mahse, hun a duh tho.
• Thikna: Thikna hi hmangaihna zia a ni lo va, tleirawl tam tak chuan thikthu a chhiat poh leh hmangaihna a nasaah an ngai fo thin.Mahse, hmangaihna aiin huamhauhna a ni mah zawk.Hmangaihna tel maih lo pawhin thikna a awm thei.
• Lunglenna: Lunglen leh ngaih veng vengna hi hmangaihna vang aiin atchilhna a ni mah zawk.Hmangaihna dik tak chuan hnathawh a tinuam a, lehkha zirnaah pawh min upi zawk tur a ni.Atchilhna erawh chuan mahni chauh a inngaihtuah a, mihring ni lovin, hmangaihna a buaipui zawk a ni.
• Mahni chauha i awm lai aiin in awm dun laiin i hmangaih lehzual a nih chuan i hmangaihna a pawnlang hleah ngai rawh.Hmangaihna dik tak chu hmangaihte tel lo pawhin a chuai chuang lo.
• I ngaihzawng laka i tawng dan, nungchang leh incheina i la fimkhur hle a nih chuan hmangaihna tak in la hlat deuh tihna a ni.I nih ang anga a hmangaih che tih i hriat chuan a bulah engmah thup leh zep awm lovin ngaihngam takin i awm thei tur a ni.I nih ang angin i lang ngam tur a ni.