A Ek a va han lian teh reng em!

Kan veng Town Bus Stand bul hnai vela mite chuan bus stand opposite a vantlang zunina zantin maia ek lo awm thin hi mak kan ti hle a. Mihring ek ni thei in kan hre lova. A ek hi a in ang tlang thin hle a ni. A hmuna mit ngeia hmutu te chuan, " A lian tha hle a, mi vawm nan hmang ta ila nikhawhrelo in kan tlu sawp ngei ang," an ti. Thenkhat phei chuan mihring ek anih an ringlo hial a. Rinhlelh thu ah sample la in phai lamah thawn tum mek a ni. Ek hi pum na tak ek a sen rawng kai deuh a ni a, a khal tha hle bawk. Tin, hetianga regular tak maia hetiang lo ti thin tu hi khawtlang hmelma ni ngeia ngaih theih a ni a, a hma lak dan hi a tenawm dangdai thin hle.

Helai vela eng welfare mah nilo ho hian ramhuai nilo mihring ek anih ngat chuan a ti tu hi kan dem tak zet a ni. Amah hi tu tih hriatloh ni mah se kan khawtlang min doldaltu ni ngeia rin theih a ni a, hetianga an hmalakna hi ti thuanawp thei tur hian hetiang hian hmalak dan tur kan ngaihtuah mek a:

1.Tlawmngaia zan duty in ruat tur nge?
2.Ek thian tur hi kan in ruat dawn?
3.Ek thian tur hi kan inruat dawn nge?
4.Amah hi manin a ek hi kan then tir thin dawn zawk em ni ang?
A ti leh anih chuan tui kan chhawp sak zawk dawn em ni ang. Lu a tihai kher mai,engpawh ni se han ti leh phawt mai teh se Chawlhhmun thil thlengte nen pawh khan inzawmna te a nei mai thei a sin. Only God Knows why....

Read more

Zopa rilru lo themthiamzia

Kan Mizo pi leh pute rilru themthiamzia kha i chhut tawh thin em? La chhut chhin ngai lo mah la, tun thleng pawh hian i hrehawm tawrh laka nawmna kawngkhar hawnsaktu che a la ni asin! Hnam dangte chuan an hriltlana han hahchhiaute hi hrehawm leh zahthlak an ti a, an hahchhiuana bula mite hnenah, " I am sorry", emaw, " Excuse me", emaw an ti chul thin a.Kan pi leh pute kha chuan an bula hahchhiaute chu, "To hnar a za e, tu nge sawi, heta hi a awm, a dam e" an lo tihkhalh thauh thung thin a.Tlangval to, nula to nih chu duh lo fa awm hek lo, hritlang hnap tui lu na bur pawh nuam ti taka an tawrh theih bakah thenkhatte phei chuan hritlan an chak ru mah mah thei thin zuk nia! Mawngtam khawihlite hi tawrh a hrehawm tehreng nen, "Khawihli chu mi vannei bawm a ni ngai e", an ti a.A tawrh hrehawm mah se, a rukin nuam an ti veng veng mai ani.
Hetiang kawng chauhah hian an rilru a themthiam lo.Fuih leh khap hauh si lova naupangte puitling duh zawng eitir loh dan leh puitling duh loh zawng eitir dan an thiam riau mai bawk.Ar ei thin chu tawng fiah theihlohna, a ngum ei chu phhunchiarna an ti a.Naupangte chu pe pe mah se, tawng fiah theilo nih te, phunchiar nihte an duh loh avangin puitlin huna la eiah an khek daih mai a ni.Ar ke erawh chu kal chakna, ar chhuang ei chu zaithiamna, ar mit ei chu mitvarna an ti leh thung a.Hnam dangte angin ar ke, ar chhuang leh ar mitte an paih ve ngai lo.Naupangte chuan a chuhin an inchuh zawk thin.
Sakei hming an lo chhawr tangkai thiamziate kha han ngaihtuah chiang teh.An rilru themthiam tak a ni.Sakei chuan tapchhaka kun a, thusawi rukte pawh hi a hrethei vek a ni, an ti thin a.Eng vanga tithin nge an nih? Hman laiin misual mantu Police leh thil tisualte hremna Jail an la nei ve lo va.Chuvang chuan ramsa zinga hlauhawm ber Sakei chu hmun pawimawh an chantir thauh mai a ni.Rukru leh dawt sawi hmang chu Sakeiin a seh duh, uire chu thingbul hnenah tal a inpuan loh chuan Sakeiin a seh thin, nula leh tlangval tlan dun chu an tlan bonaa kawng peng an zawh tawntirhah thinghnah an dah zel loh chuan Sakeiin a seh mai, te an ti a.Sakei hlau lo fa an awm si lo va.Tu nge ruk rua dawt sawi ngam ang? Uire nia rinhlelh pawh a daikalnaah an zui ru a, thingbul hnena a inpuanna atangin harsa lo takin an hre chhuak thei mai.Tlan dun pawh an tlan bona kawng penga hnimhnah an dah atangin an kalna lam awlsam takin an hre thei a, an umzui mai thin.America CIA leh FBI te'n an rilru lo themthiamzia hi hria se, engtin ngai ang maw?
Hman laia an vanram ve, Pialral mawlh mai kha, hman lai rilru phak tawka luh chakawma sawi mawi dan an lo thiam mai! Hahthikula buh leh bal thlo chhuak thinte tan chuan,thawh hah ngai tawh lova faisa ringa awm der der theihna pialral chu kai a chakawm a ni.Lum hlum hial pawha hlawh a ngamawm hlaih hliah a ni.Mizo pa nge nge! An rilru themthiamna kha India Constitution ai pawha huhang nei zawkin khawtlang inawp nan an lo chhawr tangkai thei a ni.

Read more

I Ngaihtuah ngai em?

Kan duh zawng kan duh tlat lo thin leh kan duh loh zawng kan duh leh tlat thin hi! Duh zâwng zawng ta lo va, duh loh zâwng zawn tak tlat hi!
Nghei duhtuin ngawl a vei reng tlat hi! Rawngbawltu inti siin rawngbawlsak a phut tlat hi! Chhiahhlawh nih inhuamin chhiah leh hlawh a phut tam lutuk hi! Dikna duhtu inti si, hlemhletna kawng a pensan phal der lo hi! Hlawhtlinna lamtluang zawh duh siin,hahdam a hmasak tlat thin hi! Hmangaihtu inti si, hmangaihna lantir chu sawi loh, a hmangaih ber a tichhe tlat duh hi! Dan siamtu berin dan a bawhchhe tlat thin hi!
Hetih vang hi a ni mah na, ei leh bara intodelh duhtu vek ni si, kan intodelh thei der si lo! Kawlphetha mamawh leh duhtu vek ni si, kan mamawh tawk kan insiam thei der si lo!
Kan duh zawng hi duh lo vin, kan duh loh zawng hi duh ta law law ila!

Read more

Vawksa Hi!!!

Mizote hian Vawk kan vulhna hi a rei tawh hle awm e.Kan pi leh pute hunah chuan Vawk hi an han vulh ngar ngar a, kum khat emaw hnuah an han talh a, a sa an ei a, a thau an er a, a hriak chu kumtluanin an ring thin.Lusei-ho phei chuan zan arsi lanah an Vawk chu talhin,zanlaiah Vawksa ei turin an chhungte an kaitho a,zanlaiah Vawksa ruai an theh ta mup mup thin.An chhungte koh hmaih palh an awm chuan a tuk zingah ei turin an ko leh mai thin.
Tunlai keini thangtharte pawhin Vawksa hi ei tlem a hnehin kan ei tam tial tial ta a nih hi.Kan changkangin,kan lo hausa ve ta deuh a,ruai chi hrang hrang kan theh ta deuh reng mai.Krismas,Kumthat leh ruai chi hrang hrangah hian Vawksa hian hmun a luah tam ta hle mai.Ruaitheh naah sa chi hrang hrang pawh awm mah se Vawksa kan duh deuh tlat a nih hi!!! Ruaipui siama Vawksa a tlem phei chuan mipui kan phun deuh mur mur a nih ber hi maw! A Vawksa lah hi a tui ve bawk a ni.Riltam lamah sa khuin min han ur chiai chiai a, chumi hnu rei lo teah Vawksa an han theh a-a thithun, a lei, a thin, a ke leh a ruhkawl te han ei mai hi chu dam man hi a awm hle awm e.Mahse, mahse.....Vawksa hi sa hrisel tak a ni ang em?
Tunlai chuan khawpui chu sawi loh, thingtlang khaw lian leh te pawhin Sunday zingah sa ei turah kan ngai a, kan sa ei tam ber pawh Vawksa a ni deuh ber mai.Vawksa ei puarin kan inkhawm a;thusawitu chu Pathian thu hria leh thusawi thiam tak takte'n Pathian thu min han hrilh a, kan Vawksa ei khan min ham nge kan muhil siai siai mai a nih hi!! Kan pi leh pu ringtu hmasa-ho chuan Sunday zingah sa ei tur pawh hmu lovin antam,maian velin an inhnawh puar a, an han inkhawm a;Sap, Zotawng pawh thiam mang lo leh an hnen atanga inzir chawpte'n Pathian thu an sawi a,mahse Pathian thu an zawmin an rinawm em em ani.
Kan ram chu Kristian ram a ni a.Nupui/Pasal thianghlim lo taka inneih hi sual lian tak, Pathian huat zawng tak a nih thu kan inzirtir a;mahse Pathian leh Kohhran pawh zah zolivin a rukin kan inru leh ngawt mai thin a nih hi!!! Kohhran dan khatna innei chu khawvar lam arsi ang pharh kan ni ta.Hengte hi kan Vawksa ei vang a ni thei ang em le? I lo thlir dawn teh ang.
Vawk hi ran zawng zawngah hian a nasa(sexy kan ti dawn mi?) ber mai awm e.Vawkpuiin no a han neih hian, a pui a hur leh hun (thla hnih atanga thla thum inkar velah) a note khan a pui( a Nu) kha a pawl theiin chi pawh a thlah thei a ni.Hindi tawng hmangtute pawhin naupang zahmawh lam sawi ching leh hetiang lama ninhlei deuhte chu.'Swar ka Bacha'(Vawk note ang mai) an lo ti thin.Tin,Vawksa hi Bible pawhin ei thiang lova a sawi a ni bawk.
Hetianga ran nasa taksa eitute hi kan nasain, Vawksa hian Mizote hi min lo run a ni thei ang em? Ram thenkhatin Sangha sa an ei an fin phah chuan kan Vawksa ei hian enge min thlen ve ang le??

Read more

Nike Vs St.Ambrose

Nike pheikhawk i hria ang ti raw? Hre lo nih chu thalai tan chuan zahthlak a tling thei hial ang chu! Nike Logo awm thawmhnaw eng emaw tal i inbel lo maw? Infiam mi an ni emaw, ni lo emaw, he Nike logo thawmhnaw ha thei nih chu thalaite zingah mi aia chung deuh nia inngaihna a siam hial awm a sin.Engtik laia mi nge,khawiaminge tih ka hre mai ta lo, he Nike pheikhawk siam chhuaktu Phil Knight hian hetiang siam tur hian a bei nasa hle tih ka chhiar tawh, ngaihsanawm tak a ni.Mahse a chhinchhiahna neitu Nike hi Kristian sakhua nen an lo inbei chiam tawh tih han hriat chuan ngaihdan dang min neihtir daih nia.
He Nike chhinchhiahna hi tunah chuan Pheikhawkah chauh a awm tawhlo.Infiamna thawmhnaw lam chi(sportswear) reng reng hian he chhinchhiahna hi an nei ti ila a dik awm e.Infiamna ni lemlo atan pawh an hmang tih i hawi zau deuh chuan i hre thei ang.A siamchhuaktute hian he thil hi an hmang tangkai thiam hle a.An zawrh fakna pawh hmuh tur a tam hle.He thil hi thenkhat tan ho hlein langmah se, Sports a ti lar-a tuan rang, mawi,taksa chakna hmanga thil namai lo neih theih leh dangdai tak nihna neia inngaihna leh thi thei lo hial tura inngaihna mi nuaih tam takah a siam niin an sawi.
He Nike thil hmuchhuaktu Phil Knight hian kum 1960 lam daih khan Sports pheikhawk hi a lo zuar tawh nain, a lar tak takna chi Nike hming leh a chhinchhiahna a hman hnu 1971 atang chauh khan a ni.Greek ho Pathiannu hming chawitir a lo ni hi a mi rawih pakhat ngaihtuah chhuah a ni nghe nghe.
Greek thawnthuah chuan Nike chu Crato,Bia, leh Zelus pathiante farnu a ni a, anni hi thiltihtheihna leh taihmakna pathian an ni. A lem an ziah pawhin Olympians leh mihring inkara hlawhtlinna thuthlung palai pathian Zeus/Athena kutah thla te reuh te neiin an lantir thin.Hnehna pathiannu a nih avangin, intihsiaka hnehtu chungah a lo thlawk kual a, a duhsak zawng hnenah lawmman a pe thin niin an ring.Arts Student Caroline Davidson-i chu he Nike logo siam tur hian rawih a ni a.A buaipui hah man atan $35 chiah a hlawh.An pheikhawk leh thuamhnaw dangin a lar phahzia a han hriat hi chuan hei aia hlawh tam zawk awm tak anih vei nen! Tunah chuan inkhelhna thawmhnaw chi tinah hian hmuhtur a awm a nih hi.Hlawhtlinna sang tak entirna a ni.
Nike logo hi hmanlaia Nike lem ziaka a thla lehlam ang deuh ani.Thaikawm hian thiltihtheihna, remtih chhinchhiahna a entir a.Nike Company sawifiah dan chu-'Pathiannu thlarau,mi huaisen ber leh ralhrat ber berte fuihtu entirna' an ti a ni.Tunah phei chuan,'kum zabi sawmhnihna chhunga pheikhawk,infiammi,mi ropui ber berte thiamna leh hnehna kawng hruaitu' ti hialin an sawi tawh a ni.
Heti taka lo lar leh ta Nike pathiannu hi hmanlai Rom-ho ropui laiin Kristianna avangin hnawl a lo ni tawh a.Hnawl hnu tihropui leh tumna chu St. Ambrose-an nasa takin a lo dodal a ni.Chu indona chu hneh tawh ni mah se tunah hian a rawn lar leh ta; a chak pawh a chak hle nghe nghe ani.Kum zabi palina tawp dawn lamah khan Rom sakhua,ring lo sakhua leh Kristianna indonaah Ambrose-a chuan tan a lo khawh nasa hle a.An inhnialna laipui ber chu: Rom sorkar rorelna(Senate) in puiah Hnehna Maicham(the Alter of Victory),kum zabi tam tak Rom ram roreltu(Senator)ten rinawm taka inthawina an lo hlan tawhna chu a ni.Rom-ho chuan Nike pathiannu chu 'Victoria' tiin an sawi thin.Chu inhnialnaah chuan lehlamah ring lo mi,Senator thiltithei tak Symmachus-a ho an awm a; anni chuan an khawpui leh an sakhaw hlunzia chu chhuangin,Kristianna darh zel tur chu polotics leh hnamzia(culture) hmanga dan an tum a.Symmachus-a chuan an lalber Valentian II na hnenah Senate in puia Victoria/Nike Maicham, a hmaa Kristian lalin a lo dah bo tawh chu dah let leh tura ngenin, a hnena inthawina thil hlan leh theih tura siam turin a ngen a.A lehlamah chuan Ambrose-a ho,hmanlaia a sakhua leh politics khaikawpna chu tihbo vek duhtu an awm bawk. He indona inbeihna hi Kristianna leh ringlo sakhua inbeihna nasa ber niin an lo sawi hial thin.Ring lo mite hotupa chuan chutia an pathian maicham dah bo leh Victoria/Nike hnena inthawina hlan bansan chuan Rom ram thianghlimna te,an ro hlu te, an hnam zia te a khawih pawiin a ngai a.Rom ram humhimtu,thlarau sual um botu,hnam mawlho laka vengtu sakhua niin Symmachus-a chuan a ngai a ni.Chuvangin he sakhaw biakna tihbo chu an tam chakna tih thuanawpnaah a ngai tlat a ni.Ambrose-a pawh hi mihausa chhungkua atanga lo piang, Symmachus-a nen pawha inthian tha tak a ni a.Mahse ringlo mite sakhaw thuah chuan a nem mai duh hauh lo.An inhnial apiangin Rom mite sakhua chu Kristianna aia a that zawk lohzia a sawi ngei ngei thin.Polotician te,lal te,lalber ngei pawh chu,Isua Kristaa inpuang Pathian taka chauh lakah rinawm an a ni tih a hrilh chamchi a.Pathian dang zawng zawng chu milem an ni a.Sual laka chatuan hnahna chu Victoroa/Nike maichamah a awm lova, Krista maichamah a awm zawk a ni tiin a tang bur mai a ni.
Hetia an inhnial hnu hian Rom lalber chuan Ambrose-a tanna chu a pui ta zawk a, ringlo mite serh leh sang chu Rom rorelna sang atang chuan an la bo hlen ta a.Victoria/Nike maicham chu dah bovin,tharum leh sipai chakna aiin Kraws tlawmna hmanga hnehna chu a tlo zawk tih mipuiin an pawm ta zawk a.Tun thleng hian lak luh leh a ni ta lo.
Mahse.. he Victoria/Nike chhinchhiahna chu thil zawrh fakna (advertisement) hmangin a lo kir leh ta.Khawvel sports lam thil zawng zawngah chanvo tha tam tak a rawn chang leh ta.Symmachus-a te angin zah taka an bia ang chuan an be tawh lem lo.Mahse, infiamna lam thil reng rengah chuan a lang ve ziah a,Infiamna lovah pawh a lar em em tho.He pathiannu lo lang leh hi tihbaiawmna a awm tlat asin.He chhinchhiahna hi tuan rang,chak leh thiltithei,tunlai mi tinten an ngaihhlut entirna a ni.Tum mumal kan neihloh avangin leh, a huhova pan lam kan neih loh avangin heng thilte hi kan ngaisang ani.Tuarna te hi kan ngaisang tawh lova,hlawhtlin kan chak a,thiltithei nih kan duh hle ringawt mai a nih hi.
He Nike logo(Swoosh) hi hmanlaia Nazi-ho 'Swastika' leh 'Tek chhinchhiahna' ang a ni.Thil thalo leh hlauhawm tak thil mawi tak leh hip tak hmangin an entir a.He thilin hnehna,chakna,thiltihtheihna a entir laiin chaklohna leh hlawhchhamna, natna leh famkim lohna,retheihna lhe thiltihtheih lohna te a hluar hle lawi si.
St. Ambrose-a kha lo tho leh se,tunah hian ngaihmawh tur a hmu tam hle lo'ng maw? Lalna te, thuneihna te, khawvel roreltute hlau miah lo kan va mamawh em.Ngaimawh nachang kan hriat loh laiin milem biakna min bei mek a, kan Pathian biakna maicham ngeiah milem biaknain hmun a chang a ni.Kan ram rorelna inah te hian Ambrose-a ngaihmawh ang a awm em? Ambrose-an thih pawh hlau lovin milem sakhaw biak a dodal anga dodal ngam kan mamawh hle.Kan ramah(India) ngei pawh hian Kristiante Pathian Biak In bula ringlo pathian biakna din phut an awm ve ta zel. St.Ambrose-a te ang kha lo tho lehin Krista maicham hmaa amah biak dan min zirtir dawn nge,keimahnin a nachang hriain kan thangharh ve zawk dawn?
[Ref.Iwan Russel Jones,Journal for Preachers,Lent,2000pp.25ff]

Read more

Mizote 'BER' kan nihna

Mizote hian a belchhian dawl lo lama 'ber' nihna kan ngah fu mai.A zabi-a chhiar chuan Kristian inti tamna ber kan ni a;Krista hnungzuitu dik tak tlemna ber kan ni thung.Ziak leh chhiar thiam tamna berah kan inchhal ti tih tawh a;thiamna hman tangkai tlak nei tlemna ber kan ni ngei bawk ang.Mahni ngaihdan dik tak nunpui ngam lo va,mi tam zawk tihdan zawm a,kal dum dum tamna ber phei chu kan ni chiang bang.

Read more

Mizote leh Huau huau

Mizote hi kan hnam nunphungah a huhoa thil ti hnam kan ni a, a mimala thil kan tih that peihloh leh kan tih duh mangloh hi a huho chuan phur tak leh thatho takin kan ti thin.A mimala huaisen vaklo pawh hi a huho chuan kan hrohrang a nain zah leh hlauh pawh nei lo ang hian kan ni a.Hei hian kan society-ah inlungrualna leh intluktlanna a siam a,kan society pawh a ti zahawm niin a ngaih theih ang.
Amaherawhchu,hei hian kan hnam nunah thatlohna tam tak a nei ve tho mai.Puipun nikhua leh engemaw tih pui a awm chang hian mahni in adjust kan thiam lova,mimala kan tih duh mang loh kha a huho a nih tawh chuan kan ti hreh lo mai pawh nilovin kan ti chak zek zek thin niin a lang.Huau huau a awm tawh chuan insual buai leh in hauh buaite,ruihtheih thil ti ngai lo pawhin huau huau denchhena ruih tur lo melh ve chhen te hi kan chin dan a ni a.Hei hian thil thalo tak a hring a ni.
A huhoa kan awm pawh hian,mahni chauha kan am lai anga ngaihtuahna fim hi hman thiam zir a tul hle a.Pawl emaw Association emaw hminga thil ti kan nih phei chuan,kan tih atan a mawi em? a tha em? tih ngaihtuah hmasa chung zela kan tih a pawimawh.Huau huau hi hnamdangte pawhin keini aia nasa in an nei a,mahse chu chu mahni in refresh nante, thian siam nan te,nun hahchawlh nan te an hmang thin a ni.Keini Mizo huau huau lawm hnam te hi chuan chutianga hman that ve chu kan zir a pawimawh,Concert te,ennnawm chhuahna hmunte hi mi tam tak tan chawlhhahdamna hmun tur leh in tih thawvenna hmun tur a ni a.Mahse, a mawl fal thenkhat te avangin boruak a sa luih luih a,'Kan zu in leh ruih' te miin an hre lovang tih hlau ni awm taka mawl taka kan che thin hi chu sim a hun tawh khop mai."Ber" thla kan kaichho a, huau huau pawh a tam chho leh dawn tan ta.Hetah hian Mizo hnam kan hmelthat zel nan Huau Huau hman thiam i zir theuh ang u.

Read more

Bol chiah em?

Kan President Dr APJ Abdul Kalam khan mizote nihna tak a hmuh hmaih chuan scientist-ah ka ngai thei lovang.
Mizoram University-a Convocation neih nia MZU hmunhma vel kanlo cheibawl dan kha chu a zahpuiawmlo pawh a ni thei.Zan khat kanlo mikhual chhung khan sawisel tur a neilo pawh ani thei.Mahse khawvel pum thlir pawha,'mi pakhat' nihtling,USA khua leh tui ni tura an duh em em,kan President khan ZOram boruak leh kan kalphung hi chu a vawi hnih rawn kalnaah khan engemaw chen a hmu ngei mai dawn a,sawi lem lo mah se,awmhmuna lo kimkit chawih chawih a awl ngawt mai.
Ziak leh chhiar thiam tamna ram ni si a,BPL kan tam tlat hi a hriatthiam loh thu a'n sawi nghal pang a,zah nachang hria chu tlem te kan ni ang! Kha tawngkam a chhahchhuah lai khan kan sorkar mi lianho pawh an awm ve a.zahnachang hre ve tak maw?
Ka'n pu kha a'n haw dawn a,khawii seminar emaw hruaina tur a awm toh silo,he kan ramah hian thil ropui leh hmun ropui entir tur awm hek lo,kan sorkar hotute khan Durtlang lamah an phur chho vuai vuai a,nu pakhat Anthurium khawi an han enpui ringawt a! President kawt tual khawi maw laia chin turin Anthurium bul hnih khat an han pe leh ngawt a! Kha thil kha tute'n emaw uluk taka anlo ruahman a ni chak anga,President khan ho ti tak maw?
Pangpar huan zim tak atangin an phur chhuak leh a,kan ram hruaitute thlam ropui awmna ram lam panin an tlan chhoh pui leh vawn vawn a,thlam ropui pahnih entir ta lovinSihphirah an tawppui a,Iskut an han ral thlirpui leh a! Iskut lawh sa POLYTHENE a an pek kha President khan a hmeh nghal ang em le? Pawi ta ber mai chu, Mizote eizawnna awmchhun,hlawk bawk silo chunga Mizopa'n a chawlh hahdamna thin ang hming pu-a kan hruaitu hlun pahnih thlam an entir lo kha a ni!Tlawhpui ta ngawt se
zawng,Anthurium leh Iskut mai mai ai chuan President khan hmuhnawm a ti daih awm zawk si a!
A lang theiah chuan hlawhtling leh ram hausa ni awm takin kan lang a,kan politic-te pawh hi fuh hmel chat chat viauin lang mah se,President meuh a lo kal chuan,kawngpui thenhat, a chanve chin chauh kan black top te nen lam,kan nihna dik tak,'ENGMAH' ni lo,'ENGEMAW' anga lan tum leh ram rethei,politics kalphung fuhlo in kum engemawzat a hrawm mek kan ni tih kha a va lang chiang tak em!President ni lovin,lo kal leh tur Isua phei chuan engtin tak min hmu ang maw?

Read more